Ilisimatuutut misissuineq

Ukiami 2016-mi Kurt Rasmussen sulinermi medicinereq ilisimatuutut misissuineq aallartippaa, suliassaralugu pingaarneq aalisarnerup tungaatigut Kalaallit Nunaanni sulisilluni ajutoornerit suliffimmilu pissutsit.

”Kalaallit Nunaanni sulinermi medicinatigut ilisimatuutut misissuisoqarnikuunngilaq, aammalu Kalaallit Nunaanni aalisakkerivinni aalisarnermilu suliffimmi pissutsinut ilisimasat annikippallaarlutik. Sulisilluni ajoqusernerni paasissutissani sulisilluni napparsimalernerit sulisillunilu ajoqusernerit annikipput. Nalunaarutigineqartut piviusumillu ajoqusernerit tamarmik amerlanerungaatsiassagunarput, aammalu aalisakkerinermi suliffimmi pissutsit allatut isigineqarnera ilimanarluni.”, Kurt Rasmussen oqarpoq

Kalaallit Nunaanni Sullivinni Nakkutilliisoqarfimmi pisortap Kristina Norby uppernarsivaa Kalaallit Nunaanni pissutsit ersarinngippallaartut:
”Unammillernartuuvoq aaqqissuussaasumik suliffimmi pissutsinik ilisimasaqannginnatta. Sulisilluni ajoqusernerit nalunaarutigineqartut danskininngaanniit allaanerungaatsiarput, naluarpullu suna pissutaanersoq; amigaatigaarpullu Kalaallit Nunaannut tunngasut ilisimasat naliginnaasut taavalu ilisimasat atorneqarsinnaasut.”

Pitsaaliuinerup suliffeqarfiit isumannaannerutissinnaavai

Kalaallit Nunaanni tunisassiornermi aalisakkerineq naliginnaanerpaat ilagaat, suliamilu aqutsisoq Kurt Rasmussen neriuutigaa, ilisimatuutut misissuinerup sulisunut pissutsinut pitsannguuteqarsinnaasoq suliffeqarfimmullu attaveqarneri pitsaanerulersillugu:

”Pissutsit pitsanngorsagassat ersarissarniarpagut taavalu sulisut attatiinnarniarlugit. Taamaaliorniarpugut soorlu aalisakkerivinni sulisut amikkut sapigaqarnikkullu nappaatit nalilersorlugit taavalu sulinermi aalariaatsinit nungullarnerit sulisilluni ajutoornerillu. Kalaallit Nunaanni innuttaasunut pingaaruteqartupilussuussooq, suliffeqarfiit pissutsit naapertuutinngittut aaqqissinnaagunikkit sulisullu attatiinnarlunikkit,” Kurt Rasmussen isumaqarpoq.

Suliffigissaaneq pillugu Siunnersuisoqatigiinniit aningaasat

Suliaq Suliffigissaaneq pillugu Siunnersuisoqatigiinniit aningaasaliisut ilagivaat, decemberi 2015-mi Suliffimmi pissutsit pillugit nersornaammik aalisakkerinermi suliffimmi pissutsinik ilisimatuutut misissuinera pissutigalugu. Nersornaat 100.000 koruuninik nalilik misissuinermi aallartisaassutitut atorput. Saniatigullu Kalaallit Nunaanni fondit suliffeqarfiillu tapeeqataapput, Kalaallit Nunaannilu suliffeqarfiit marluk anginersaat (Royal Greenland aamma Polar Seafood Greenland) sulisut 600 misissuinerni peqataasinnaasutut akuerineqarput, suliamilu sulisut misissorsinnaallugu suliffimmi pissutsit peqqissusaallu. Tamannalu isumaqarpoq misissinermi peqataasut procentii annertunerullutik eqqortuunerullutillu.

Ilisimatuutut misissuinermi paasissutissat:

Misissueqataasut ukuupput: Arbejdsmedicinsk Klinik-minngaanniit arbejdsmidicinerit, Herning, Institut for Folkesundhed, Aarhus Universitet aamma Arbejdsmedicinsk Klinik, Bispebjerg hospital. Aammalu Kalaallit Nunaanni inuussutissarsiortut, peqatigiiffiit peqqinnissaqarfillu qanimut suleqatigineqarput. Misissuineq piffissami juuli 2016 – decemberi 2017 akornanni ingerlanneqassaaq